വിദ്യാര്‍ത്ഥികളും അധ്യാപകരുമായി പോയ വാഹനങ്ങള്‍ അപകടത്തില്‍പ്പെട്ട് സൗദിയില്‍ ഒമ്പത് പേര്‍ക്ക് പരിക്ക്
റിയാദ്: സൗദി അറേബ്യയില്‍ വിദ്യാര്‍ത്ഥികളും അധ്യാപകരുമായി പോയ രണ്ട് വാഹനങ്ങള്‍ കൂട്ടിയിടിച്ച് അപകടം. അപകടത്തില്‍ 9 പേര്‍ക്ക് പരിക്കേറ്റു. ഞായറാഴ്ചയാണ് തെക്ക് പടിഞ്ഞാറന്‍ സൗദിയില്‍ അപകടമുണ്ടായത്.
അല്‍ ബാഹ മേഖലയിലെ അല്‍ മക്വാ ഗവര്‍ണറേറ്റില്‍ വനിതാ അധ്യാപകരെയും വിദ്യാര്‍ത്ഥികളെയും കയറ്റി കൊണ്ടുപോയ മിനിബസ് വിദ്യാര്‍ത്ഥികളുമായി പോയ വാഹനത്തില്‍ ഇടിക്കുകയായിരുന്നു. വിവരം അറിഞ്ഞ ഉടന്‍ തന്നെ സൗദി റെഡ് ക്രസന്‍റ് സംഘം അപകടം നടന്ന സ്ഥലത്തെത്തിയിരുന്നു. അപകടത്തില്‍ പരിക്കേറ്റവരെ പ്രാദേശിക ആശുപത്രികളില്‍ പ്രവേശിപ്പിച്ചു. പരിക്കേറ്റവരില്‍ ഒരാളുടെ നില ഗുരുതരമാണ്. അപകടം ഉണ്ടായതെങ്ങനെയെന്ന് വ്യക്തമായിട്ടില്ല.
