സാഹിത്യ നൊബേല് കൊറിയന് എഴുത്തുകാരി ഹാന് കാങിന്
സാഹിത്യത്തിനുള്ള നൊബേല് സമ്മാനം പ്രഖ്യാപിച്ചു. ദക്ഷിണ കൊറിയന് എഴുത്തുകാരി ഹാന് കാങാണ് പുരസ്കാരത്തിന് അര്ഹയായത്. മനുഷ്യ ജീവിതത്തിന്റെ ദുര്ബലാവസ്ഥ തുറന്നുകാട്ടുന്ന തീവ്ര കാവ്യാത്മക ശൈലിയാണ് ഹാനിന്റേതെന്ന് ജൂറി വിലയിരുത്തി. ജീവതാവസ്ഥകളോട് എഴുത്തുകാരി കാട്ടുന്ന സഹാനുഭൂതിയെ അത്യധികം കാവ്യാത്മകമായി ആവിഷ്കരിക്കാന് ഹാനിന്റെ എഴുത്തുകള്ക്ക് സാധിക്കുന്നതായും ജൂറി അംഗങ്ങള് പ്രസ്താവിച്ചു.
1993ല് ‘ലിറ്ററേച്ചര് ആന്ഡ് സൊസൈറ്റി’ എന്ന മാസികയില് നിരവധി കവിതകള് പ്രസിദ്ധീകരിച്ചുകൊണ്ടാണ് ഹാന് കാങ് സാഹിത്യരംഗത്തേക്ക് ചുവടുവയ്ക്കുന്നത്. 1995ല് ലവ് ഓഫ് യോസു എന്ന പേരില് ഹാന് തന്റെ ആദ്യ ചെറുകഥാ സമാഹാരം പുറത്തിറക്കി. ദി വെജിറ്റേറിയന് എന്ന പേരിലുള്ള നോവലിന്റെ പേരിലാണ് ഹാന് അന്താരാഷ്ട്ര തലത്തില് തന്നെ ശ്രദ്ധിക്കപ്പെടുന്നത്. തനിക്കുമേല് അടിച്ചേല്പ്പിക്കപ്പെടുന്ന ഭക്ഷണ നിയമങ്ങള്ക്ക് വഴങ്ങാന് മടിച്ച് പ്രതിരോധിച്ചുതുടങ്ങുന്ന ഒരാളുടെ കഥയായിരുന്നു ദി വെജിറ്റേറിയന്.
ഹാനിന്റെ പിതാവും പ്രശസ്തനായ ഒരു കൊറിയന് നോവലിസ്റ്റാണ്. എഴുത്തിന് പുറമേ ആര്ട്ട്, മ്യൂസിക് എന്നിവയിലും ഹാന് മികവ് പ്രകടിപ്പിച്ചിട്ടുണ്ട്. സാഹിത്യത്തിനുള്ള നൊബേല് സമ്മാനം ആദ്യമായാണ് ഒരു ദക്ഷിണ കൊറിയന് എഴുത്തുകാരിക്ക് ലഭിക്കുന്നത്.