‘പാര്ട്ടിക്കുള്ളില് ജനാധിപത്യത്തിന് വേണ്ടി പോരാടിയ ആളുകളാണ് പികെ ശശിയും താനും; രണ്ടുപേരും അതില് പരാജയപ്പെട്ടു’; ശശി തരൂര്
പാര്ട്ടിക്കുള്ളില് ജനാധിപത്യത്തിന് വേണ്ടി പോരാടിയ ആളാണ് പി.കെ ശശിയും,താനുമെന്ന് ഡോ ശശി തരൂര് എം.പി. രണ്ടുപേരും അതില് പരാജയപ്പെട്ടെന്നും ശശി തരൂര് പറഞ്ഞു. ഒറ്റപ്പാലത്ത് യു.ഡി.എഫ് സ്വതന്ത്ര സ്ഥാനാര്ഥി പി.കെ ശശിയുടെ തിരഞ്ഞെടുപ്പ് പ്രചാരണത്തിന്റെ ഭാഗമായി നടത്തിയ റോഡ് ഷോക്ക് ശേഷം നടന്ന പൊതുയോഗം ഉദ്ഘാടനം ചെയ്യുകയായിരുന്നു ശശി തരൂര്. (Shashi Tharoor at PK Sasi’s election campaign)പേരില് മാത്രമല്ല ഞങ്ങള് തമ്മില് സാമ്യം. അദ്ദേഹം അദ്ദേഹത്തിന്റെ പാര്ട്ടിക്കകത്ത് ജനാധിപത്യത്തിന് വേണ്ടി വാദിച്ചു. അദ്ദേഹം നല്ല കഷ്ടപ്പെട്ട് ജനാധിപത്യത്തിന് വേണ്ടി വാദിച്ചു. ഞാനും എന്റെ പാര്ട്ടിക്കകത്ത് അത് ചെയ്തിരുന്നത് നിങ്ങള്ക്കറിയാമല്ലോ. രണ്ടാളും പരാജയപ്പെട്ടു. പക്ഷേ എന്റെ പാര്ട്ടി എന്നെ പരിഗണിച്ചു. അദ്ദേഹത്തിന്റെ പാര്ട്ടി അദ്ദേഹത്തെ നമ്മുടെ അടുത്തേക്ക് അയച്ചു തന്നു. ഐക്യ ജനാധിപത്യ മുന്നണി സ്ഥാനാര്ഥിയായി മാറി – തരൂര് പറഞ്ഞു.അതേസമയം, കേരളം ബൂത്തിലേക്ക് പോകാന് ദിവസങ്ങള് മാത്രം അവശേഷിക്കെ പ്രചാരണം ശക്തമാക്കി മുന്നണികള്. ഇന്നലെ പ്രധാനമന്ത്രി കേരളത്തില് എത്തി ഇരു മുന്നണികള്ക്കും എതിരെ ആഞ്ഞടിച്ചതിന് പിന്നാലെ രാഹുല് ഗാന്ധിയുടെ കേരളത്തിലെ തിരഞ്ഞെടുപ്പ് പ്രചാരണത്തിന് ഇന്ന് പത്തനംതിട്ടയില് തുടക്കമാകും. ആറന്മുള, കോന്നി, റാന്നി, തിരുവല്ല മണ്ഡലങ്ങളിലെ സംയുക്ത സമ്മേളനം രാഹുല് ഉദ്ഘാടനം ചെയ്യും.
ശേഷം കോട്ടയം ജില്ലയിലും പ്രചരണത്തിനെത്തും. ഉച്ച കഴിഞ്ഞ് രണ്ടുമണിക്ക് പുതുപ്പള്ളി മണ്ഡലത്തിലെ പാമ്പാടിയില് ചാണ്ടി ഉമ്മന്റെ തിരഞ്ഞെടുപ്പ് പ്രചാരണത്തിനാണ് ആദ്യം എത്തുന്നത്. തുടര്ന്ന് കോട്ടയം മണ്ഡലത്തിലും ഏറ്റുമാനൂര് മണ്ഡലത്തിലും രാഹുല് ഗാന്ധിയെത്തും. രാഹുല് ഗാന്ധി എത്തുന്നതിന് തുടര്ന്ന് കോട്ടയം നഗരത്തില് അടക്കം ഉച്ചയ്ക്ക് ശേഷം ഗതാഗത നിയന്ത്രണവും ഏര്പ്പെടുത്തിയിട്ടുണ്ട് .
