‘രൂപയുടെ മൂല്യ തകർച്ചയും വ്യാവസായിക ഇന്ധന വിലയിലെ കുത്തനെയുള്ള വർധനവും വരാനിരിക്കുന്ന പണപ്പെരുപ്പത്തിന്റെ സൂചകങ്ങൾ’; രാഹുൽ ഗാന്ധി
രൂപയുടെ മൂല്യ തകർച്ചയും വ്യാവസായിക ഇന്ധന വിലവർധനയും വരാനിരിക്കുന്ന പണപ്പെരുപ്പത്തിന്റെ സൂചനയാണെന്ന് രാഹുൽ ഗാന്ധി എം പി. കേന്ദ്രത്തിനെതിരെ ശക്തമായി ആഞ്ഞടിച്ചുകൊണ്ടായിരുന്നു രാഹുലിന്റെ പ്രതികരണം. തിരഞ്ഞെടുപ്പിന് ശേഷം, പെട്രോൾ, ഡീസൽ, എൽപിജി വിലകളും ഉയർത്തും.നിത്യോപയോഗ സാധനങ്ങളുടെ വില ഉയരും അത് ചെറുകിട കച്ചവടങ്ങളെ ബാധിക്കുമെന്നും സാധാരണക്കാരുടെ കുടുംബ ചെലവുകളെ തകിടംമറിക്കുമെന്നും മോദി സർക്കാരിന് ദിശാബോധം ഇല്ലെന്നും രാഹുൽ ഗാന്ധി വിമർശനം ഉന്നയിച്ചു. എക്സിലൂടെയായിരുന്നു വിമർശനം.പശ്ചിമേഷ്യൻ സംഘർഷത്തെത്തുടർന്ന് ആഗോള വിതരണ ശൃംഖലയിലെ തടസ്സങ്ങൾക്കിടയിലും വെള്ളിയാഴ്ച ഡോളറിനെതിരെ രൂപയുടെ മൂല്യം റെക്കോർഡ് താഴ്ന്ന നിലയിലേക്ക് 93.12 ആയി കുറഞ്ഞു. ആഭ്യന്തര കറൻസി 0.55% ഇടിഞ്ഞ് 93.12 ആയി, ബുധനാഴ്ചത്തെ ഏറ്റവും താഴ്ന്ന നിലയായ 92.63 നെ മറികടന്നു. പശ്ചിമേഷ്യൻ പിരിമുറുക്കങ്ങൾ ആരംഭിച്ചതിനുശേഷം രൂപയുടെ മൂല്യം ഏകദേശം 2% കുറഞ്ഞു.
