വാൽപ്പാറയിൽ അമ്മയ്‌ക്കൊപ്പം നടന്ന ആറു വയസ്സുകാരിയെ പുലി കൊന്നു
അമ്മയ്‌ക്കൊപ്പം തേയിലത്തോട്ടത്തിലൂടെ നടന്നു പോവുകയായിരുന്ന ആറു വയസ്സുകാരിയെ പുലി കടിച്ചെടുത്തുകൊണ്ടുപോയി കൊന്നു. വാൽപ്പാറയിലെ കേരള തമിഴ്നാട് അതിർത്തിയിലെ ഉഴേമല എസ്റ്റേറ്റിലാണ് സംഭവം. ജാർഖണ്ഡ് സ്വദേശിനി അപ്‌സര ഖാത്തൂനെയാണ് പുള്ളിപ്പുലി കടിച്ചുകൊന്നത്.
എസ്റ്റേറ്റിലൂടെ അമ്മയോടൊപ്പം ചായ കുടിക്കാൻ പോയതാണ് അപ്‌സര. തേയിലത്തോട്ടത്തിൽ പതുങ്ങിയിരുന്ന പുലി കുട്ടിയെ കടിച്ചു കൊണ്ടുപോയി. അമ്മ നിലവിളിച്ചതോടെ പുലി ഓടി മറഞ്ഞു. കരച്ചിൽ കേട്ടെത്തിയ നാട്ടുകാരുടെ നേതൃത്വത്തിൽ തിരച്ചിൽ നടത്തിയെങ്കിലും ആദ്യഘട്ടത്തിൽ കുട്ടിയെ കണ്ടെത്താനായില്ല. പിന്നീട് വനം വകുപ്പ് ഉദ്യോഗസ്ഥർ ഉൾപ്പെടെ എത്തി നടത്തിയ തിരച്ചിലിൽ വനാതിർത്തിയിൽ നിന്ന് കുട്ടിയുടെ മൃതദേഹം കണ്ടെടുക്കുകയായിരുന്നു. മൃതദേഹം വാൽപ്പാറയിലെ സർക്കാർ ആശുപത്രിയിലേക്ക് മാറ്റി. ജാർഖണ്ഡിൽ തേയിലത്തോട്ടത്തിൽ ജോലിക്കായി എത്തിയതാണ് അപ്സരയുടെ കുടുംബം.
