സാധാരണക്കാരന്റെ ഭാഷയാണ് പിണറായിയുടേത്, തകഴിയുടെ ശൈലിയില് സംസാരിക്കാനാവില്ല’: വെള്ളാപ്പള്ളി നടേശൻ
തൃശൂരിൽ സുരേഷ് ഗോപി വിജയിക്കുമെന്ന് വ്യക്തിപരമായി പ്രതീക്ഷിച്ചില്ലെന്ന് എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശന്. ഇടതിന്റെ ജനകീയ അടിത്തറ പിന്നാക്കങ്ങളാണ്. മുസ്ലിം പ്രീണനമാണ് നടന്നത്. ലോക്സഭാ തെരഞ്ഞെടുപ്പില് കോണ്ഗ്രസും നിയമസഭാ തിരഞ്ഞെടുപ്പില് എല്ഡിഎഫും വിജയിക്കുന്ന രീതിയാണ് കുറേനാളായി കാണുന്നത്.
ചെത്തുകാരന്റെ മകനാണ്, സാധാരണക്കാരന്റെ ഭാഷയാണ് പിണറായിയുടേത്. സ്ഥാനത്തിരിക്കുമ്പോള് ആ പദവിക്ക് നിരക്കുന്ന രീതിയില് സംസാരിക്കുന്നതാണ് അഭികാമ്യം. അതാണ് എപ്പോഴും നല്ലതെന്നും വെള്ളാപ്പള്ളി പ്രതികരിച്ചു.
തുഷാര് വെള്ളാപ്പള്ളി ഒരിക്കലും കേന്ദ്രമന്ത്രി ആകില്ല. തനിക്ക് താല്പര്യമില്ല. കേന്ദ്രമന്ത്രി ആകുന്നതിനോട് താന് എതിരാണെന്നും വെള്ളാപ്പള്ളി പറഞ്ഞു. ആലപ്പുഴ എല്ഡിഎഫ് തോല്ക്കാന് പാടില്ലാത്ത സീറ്റാണ്. എങ്ങനെ തോറ്റു എന്ന് അവര് ചിന്തിക്കണം.
ഗീവര്ഗീസ് കൂറിലോസിനെതിരായ മുഖ്യമന്ത്രി പിണറായി വിജയന്റെ പ്രസ്താവന ഒഴിവാക്കേണ്ടതായിരുന്നുവെന്ന് എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശന്. പിണറായിക്ക് പറയാം, മുഖ്യമന്ത്രി പറയുമ്പോള് കരുതല് വേണം. തകഴിയുടെ ശൈലിയില് സംസാരിക്കാന് പിണറായിക്കാവില്ല.
ആലപ്പുഴയില് പോലും ഈഴവര്ക്ക് പാര്ട്ടിയില് പരിഗണനയില്ല. ഇവിടെ ഇല്ലെങ്കില് എവിടെയാണ് ലഭിക്കുക? ആലപ്പുഴയില് സ്ഥാനാര്ത്ഥി നിര്ണയത്തില് പാളിച്ചയുണ്ടായി. ആരിഫിനെ നിര്ത്താന് പാടില്ലായിരുന്നുവെന്ന് വെള്ളാപ്പള്ളി നടേശന് കൂട്ടിച്ചേര്ത്തു.