നിർത്തിവച്ച ഐപിഎൽ മെയ് 16ന് പുനരാരംഭിച്ചേക്കും; ഫൈനൽ മെയ് 30നെന്നും റിപ്പോർട്ട്
ഇന്ത്യയും പാകിസ്താനും തമ്മിലുള്ള സൈനിക സംഘർഷത്തെത്തുടർന്ന് 2025 ഐപിഎൽ താൽക്കാലികമായി നിർത്തിവച്ചതിന് ദിവസങ്ങൾക്ക് ശേഷം, ലീഗ് പുനരാരംഭിക്കുന്നതിനെക്കുറിച്ച് ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) ആദ്യ സൂചന നൽകി. ഐപിഎൽ മെയ് 16ന് പുനരാരംഭിക്കുമെന്നാണ് റിപ്പോർട്ട്.
ചെന്നൈ, ഹൈദരാബാദ്, ബംഗളൂരു എന്നീ മൂന്ന് വേദികളിലായിരിക്കും മത്സരങ്ങൾ നടക്കുക. ഒരു ദിവസം രണ്ടു മത്സരങ്ങൾ വച്ച് ലീഗ് റൗണ്ട് പൂർത്തിയാക്കും. ഫൈനൽ മെയ് 30നെന്നും റിപ്പോർട്ടുകൾ പറയുന്നു. ബിസിസിഐയുടെ ഔദ്യോഗിക പ്രഖ്യാപനം ഇന്ന് രാത്രി ഉണ്ടാകും.
സുരക്ഷാ കാരണങ്ങളാൽ ടൂർണമെന്റ് താൽക്കാലികമായി നിർത്തിവയ്ക്കേണ്ടിവന്നതിനെത്തുടർന്ന് നിരവധി വിദേശ താരങ്ങൾ രാജ്യം വിട്ടു. ടി20 ലീഗ് പുനരാരംഭിക്കാവുന്ന തീയതി സംബന്ധിച്ച് ഇന്ത്യൻ സർക്കാരിന്റെ അനുമതിക്കായി ബോർഡ് കാത്തിരിക്കുമ്പോൾ തന്നെ, കളിക്കാരെ തിരിച്ചുവിളിക്കാൻ ബിസിസിഐയും ഫ്രാഞ്ചൈസികളും നീക്കം ആരംഭിച്ചിട്ടുണ്ട്.
ഇഎസ്പിഎൻ ക്രിക്ക്ഇൻഫോയുടെ റിപ്പോർട്ട് പ്രകാരം , പത്ത് ഫ്രാഞ്ചൈസികൾക്കും ഐപിഎല്ലിലേക്ക് വിദേശ താരങ്ങളെ തിരിച്ചുവിളിക്കുന്നത് ഇപ്പോഴും വലിയ ആശങ്കയാണ്. ഇന്ത്യയും പാകിസ്താനും തമ്മിൽ വെടിനിർത്തൽ കരാറിലെത്തിയതിനെത്തുടർന്ന് ചില ടീമുകൾക്ക് വലിയൊരു വിഭാഗം കളിക്കാർ രാജ്യം വിടുന്നത് വിലക്കിയിരുന്നു. ഇനി മുതൽ പദ്ധതി പ്രകാരം എല്ലാം നടന്നാൽ മെയ് 16 ഓടെ ഐപിഎൽ ആരംഭിക്കുമെന്നും റിപ്പോർട്ട് അവകാശപ്പെടുന്നു.
ഈ സീസണിലെ ഏറ്റവും മികച്ച ഫോമിലുള്ള ടീമുകളിലൊന്നായ ഗുജറാത്ത് ടൈറ്റൻസിൽ നിന്ന് രണ്ട് വിദേശ കളിക്കാർ മാത്രമേ ടീം വിട്ടിട്ടുള്ളൂ – ജോസ് ബട്ലറും ജെറാൾഡ് കോറ്റ്സിയും. എന്നാൽ ഇപ്പോൾ അവരെ തിരികെ കൊണ്ടുവരാനുള്ള ശ്രമങ്ങൾ നടക്കുന്നു. ടൂർണമെന്റിൽ ആകെ 12 ലീഗ് സ്റ്റേജ് മത്സരങ്ങളും നാല് പ്ലേ-ഓഫ് സ്റ്റേജ് മത്സരങ്ങളും ഇനി നടക്കാനുണ്ട്.
