യുഎഇയിലെ 10 വർഷത്തെ ബ്ലൂ റസിഡൻസി വിസ, ആദ്യ ഘട്ടത്തിന് തുടക്കം

രാജ്യത്തിനകത്തും പുറത്തും പരിസ്ഥിതി സംരക്ഷണം, സുസ്ഥിരത തുടങ്ങിയ വിഷയങ്ങളിൽ ​ഗണ്യമായ സംഭാവനകൾ നൽകിയ വ്യക്തികളെ ആദരിക്കുന്നതിനായാണ് 10 വർഷത്തെ ബ്ലൂ റസിഡൻസി വിസ യുഎഇ സർക്കാർ കൊണ്ടുവന്നത്. പരിസ്ഥിതി പ്രവർത്തനങ്ങളെ പിന്തുണയ്ക്കുന്നവർ, അന്താരാഷ്ട്ര സംഘടനകളിലെ അംഗങ്ങൾ, അന്താരാഷ്ട്ര കമ്പനികൾ, അസോസിയേഷനുകളിലെയും സർക്കാരിതര സംഘടനകളിലെയും അംഗങ്ങൾ, ആഗോള അവാർഡ് ജേതാക്കൾ, പരിസ്ഥിതി പ്രവർത്തനങ്ങളിലെ വിശിഷ്ട പ്രവർത്തകർ, ഗവേഷകർ എന്നിവർക്കാണ് ഈ വിസ നൽകുന്നത്. ​ഗോൾഡൻ, ​ഗ്രീൻ വിസകളുടെ ഒരു വിപുലീകരണമാണ് ബ്ലൂ വിസ.

ആദ്യ ഘട്ടത്തിൽ സുസ്ഥിരത മേഖലയിലെ സർക്കാർ ഏജൻസികൾ വഴി സമർപ്പിക്കുന്ന അപേക്ഷകൾക്ക് ഇലക്ട്രോണിക് അംഗീകാരം നേടുകയാണ് ചെയ്യുന്നത്. ഇത് അതോറിറ്റിയുടെ വെബ്‌സൈറ്റിലെ നടപടിക്രമങ്ങൾക്ക് അനുസൃതമായിട്ടായിരിക്കും ലഭിക്കുന്നത്. ഫെഡറൽ അതോറിറ്റി ഫോർ ഐസിപിയുടെ ഔദ്യോ​ഗിക വിസ പ്ലാറ്റ്ഫോമായ smartservices.icp.gov.ae എന്ന വെബ്സൈറ്റിലൂടെയാണ് ബ്ലൂ റെസിഡൻസി വിസയ്ക്ക് അപേക്ഷ സമർപ്പിക്കേണ്ടത്. യുഎഇയിലെ യോഗ്യതയുള്ള അധികാരികളുടെ നാമനിർദ്ദേശം വഴിയും അപേക്ഷിക്കാം. നാമനിർദേശ അപേക്ഷ നൽകുന്നതിനുള്ള ഫീസ് 350 ദിർഹമാണ്.