സേവ കേന്ദ്രം ആക്രമിക്കാനെത്തിയവരെ തടഞ്ഞതിന് ആര്‍എസ്എസ് പ്രവര്‍ത്തകനെ വെട്ടിപ്പരുക്കേല്‍പ്പിച്ചു; ആറ് സിപിഐഎം പ്രവര്‍ത്തകര്‍ക്കെതിരെ കേസ്
കണ്ണൂര്‍ ധര്‍മ്മടത്ത് ആര്‍ എസ് എസ് പ്രവര്‍ത്തകന് നേരെ ആക്രമണം. ധര്‍മ്മടം സ്വദേശി ആദിത്യന് ആക്രമണത്തില്‍ ഗുരുതരമായി പരുക്കേറ്റു. സംഭവത്തില്‍ ആറ് സിപിഐഎം പ്രവര്‍ത്തകര്‍ക്കെതിരെ പൊലീസ് വധശ്രമത്തിന് കേസെടുത്തു.
സിപിഐഎം പ്രവര്‍ത്തകരായ പ്രിയ ദേവ്, അതുല്‍ പവിത്രന്‍, മിഥുന്‍, സായി കിരണ്‍, സജേഷ്, അശ്വിന്‍ അശോക് എന്നിവര്‍ക്കെതിരെയാണ് ധര്‍മ്മടം പൊലീസ് കേസെടുത്തത്. തുടര്‍ സംഘര്‍ഷങ്ങള്‍ തടയാന്‍ പ്രദേശത്ത് പൊലീസ് സുരക്ഷ ശക്തമാക്കി.
ധര്‍മ്മടത്ത് ആര്‍ എസ് എസ് നിയന്ത്രണത്തില്‍ പുതുതായി നിര്‍മിക്കുന്ന സേവാ കേന്ദ്രത്തിന് സമീപത്ത് വെച്ചായിരുന്നു ആക്രമണം. സേവ കേന്ദ്രം ആക്രമിക്കുക എന്ന ഉദ്ദേശത്തോട് കൂടിയാണ് സിപിഐഎം പ്രവര്‍ത്തകര്‍ എത്തിയതെന്നാണ് പൊലീസിന്റെ കണ്ടെത്തല്‍. ഇത് തടഞ്ഞതിനെ തുടര്‍ന്നാണ് ആദിത്യത്തിന് നേരെ ആക്രമണമുണ്ടായത്. കയ്യില്‍ കരുതിയിരുന്ന ആയുധങ്ങള്‍ ഉപയോഗിച്ച് വെട്ടി പരുക്കേല്‍പ്പിക്കുകയായിരുന്നു. വലത് കൈക്ക് പരുക്കേറ്റ ആദിത്യന് തലശേരിയിലെ ഇന്ദിരാ ഗാന്ധി സഹകരണ ആശുപത്രിയില്‍ ചികിത്സയിലാണ്. പ്രതികള്‍ ആക്രമണം നടന്ന സ്ഥലത്തേക്ക് വന്നുപോകുന്ന സിസിടിവി ദൃശ്യം പുറത്തുവന്നു.