ഓളപ്പരപ്പിലെ സൗന്ദര്യം ആസ്വദിക്കാൻ ബോട്ട് ഷോ; ഓള്‍ഡ് ദോഹ തുറമുഖത്ത് നവംബർ 6-ന് ആരംഭിക്കും
പ്രമുഖ മറൈന്‍ കമ്പനികളും ബ്രാന്‍ഡുകളും പങ്കെടുക്കുന്ന ഖത്തർ ബോട്ട് ഷോ നവംബർ 6ന് ആരംഭിക്കും. ഓള്‍ഡ് ദോഹ തുറമുഖത്ത് നടക്കുന്ന പ്രദർശനം നവംബര്‍ 9 വരെ തുടരും. പ്രാദേശികമായി ഖത്തറില്‍ നിര്‍മ്മിച്ച ബോട്ടുകളും മറൈന്‍ കപ്പലുകളും പ്രദർശനത്തിലുണ്ടാകും. 20,000 സന്ദര്‍ശകരെയാണ് ഇത്തവണ പ്രതീക്ഷിക്കുന്നത്. ഓള്‍-വാട്ടര്‍ സ്ലോട്ടുകളുടെ 95 ശതമാനവും ബുക്ക് ചെയ്തതായി ഓള്‍ഡ് ദോഹ പോര്‍ട്ട് അറിയിച്ചു. സൂപ്പര്‍ യാച്ചുകളും ബോട്ടുകളും പ്രദര്‍ശനത്തിനെത്തും.
ഓള്‍ഡ് ദോഹ പോർട്ടിലെ ഷോർലൈൻ ഡിസ്‌പ്ലേയിൽ 350-ലധികം മറൈൻ ബ്രാൻഡുകൾ, അൽ ദാർ മറൈൻ, ദോഹ ക്രാഫ്റ്റ് മറൈൻ, ജാസിം അഹമ്മദ് അൽ ലിംഗാവി ട്രേഡിംഗ് എന്നിവയുടെ ഏറ്റവും പുതിയ ലെഷർ ബോട്ടുകളിൽ നിന്നുള്ള ഓൺ-ഗ്രൗണ്ട് ബോട്ടുകൾ എന്നിവ പ്രദർശനത്തിന് മാറ്റ് കൂട്ടും.
വാട്ടർ സ്‌പോർട്‌സിനും മത്സ്യബന്ധന ഉപകരണങ്ങൾക്കുമായി 100-ലധികം ബ്രാൻഡുകളും വാട്ടർസ്‌പോർട്‌സ് ഏരിയയിൽ തത്സമയ പ്രദർശനങ്ങളും സംഘടിപ്പിക്കും. സ്റ്റാൻഡ്-അപ്പ് പാഡലിംഗ്, കയാക്കിംഗ്, കനോയിംഗ്, ജെറ്റ് സ്കീയിംഗ്, പാഡിൽ ബോർഡിംഗ് തുടങ്ങിയ ആവേശകരമായ വാട്ടർസ്‌പോർട് സാഹസികതകളും ഷോകളും ഉണ്ടാകും. സന്ദർശകർക്ക് ഡൈനാമിക് ഖത്തർ ബോട്ട് ഷോ മത്സരങ്ങൾ, ആകർഷകമായ നൃത്ത ജലധാരകൾ, തത്സമയ സംഗീത പ്രകടനങ്ങൾ എന്നിവ കാണാനും, ആവേശകരമായ കാർ പരേഡ്, കുതിരസവാരി, ഡ്രാഗൺ ബോട്ട് ഷോ, പടക്കങ്ങൾ എന്നിവ കാണാനും അവസാരമുണ്ട്. സമുദ്ര വ്യവസായത്തെ കുറിച്ച് മനസിലാക്കാൻ എക്സിബിറ്റർ ബൂത്തുകളിൽ ഏറ്റവും പുതിയ നൂതന സാങ്കേതികവിദ്യയും ഉപകരണങ്ങളും പ്രദർശിപ്പിക്കും. ഖത്തർ ഗതാഗത മന്ത്രാലയമാണ് പ്രദർശനത്തിന്റെ മുഖ്യ പ്രായോജകർ.