ജാവദേക്കറുമായുള്ള കൂടിക്കാഴ്ചയിൽ വിവാദം പുകയുന്നതിനിടെ ഇ പി ജയരാജൻ ഇന്ന് സിപിഐഎം സെക്രട്ടറിയേറ്റിൽ പങ്കെടുക്കും
ഇന്ന് നടക്കുന്ന സിപിഐഎം സംസ്ഥാന സെക്രട്ടറിയേറ്റ് യോഗത്തിൽ ഇ പി ജയരാജൻ പങ്കെടുക്കും. യോഗത്തിൽ പങ്കെടുക്കാനായി ഇ പി ജയരാജൻ തിരുവനന്തപുരത്തെത്തി. കണ്ണൂരിൽ നിന്നും വിമാനമാർഗത്തിലാണ് അദ്ദേഹം തിരുവനന്തപുരത്തെത്തിയിരിക്കുന്നത്. പ്രകാശ് ജാവദേക്കറുമായുള്ള കൂടിക്കാഴ്ചയും ശോഭാ സുരേന്ദ്രന്റേയും ദല്ലാൾ നന്ദകുമാറിന്റേയും അവകാശവാദങ്ങളും വിവാദമാകുന്ന പശ്ചാത്തലത്തിൽ ഇ പി യോഗത്തിൽ പങ്കെടുക്കുന്നതിന് ഏറെ രാഷ്ട്രീയ പ്രാധാന്യമുണ്ട്. ഇന്നലെ വരെ ഇ പി ജയരാജൻ യോഗത്തിൽ പങ്കെടുക്കുമോ എന്നതിൽ വ്യക്തതയില്ലായിരുന്നു.
പ്രകാശ് ജാവദേക്കറുമായുള്ള കൂടിക്കാഴ്ചയെക്കുറിച്ച് ഇ പി സിപിഐഎം സംസ്ഥാന സെക്രട്ടറിയേറ്റിൽ വിശദീകരണം നൽകുമെന്നാണ് സൂചന. ഇ പി ജയരാജൻ പ്രകാശ് ജാവദേക്കറുമായി കൂടിക്കാഴ്ച നടത്തിയതും തുടർന്നുണ്ടായ വിവാദങ്ങളിലും സിപിഐയും അതൃപ്തി പരസ്യമാക്കിയിരുന്നു. എൽഡിഎഫ് കൺവീനറായ ഇ പി ജയരാജൻ മൂലം തെരഞ്ഞെടുപ്പിനോട് അടുത്ത ദിനങ്ങളിൽ മുന്നണി പ്രതിസന്ധിയിലായെന്നും പരക്കെ മുറുമുറുപ്പുകൾ ഉയരുന്നുണ്ട്. ഇ പി ജയരാജനെ ബിജെപിയിലെത്തിക്കാൻ പ്രകാശ് ജാവദേക്കറുമായി ചർച്ച നടന്നെന്നായിരുന്നു ശോഭാ സുരേന്ദ്രനും മാധ്യമങ്ങളോട് പറഞ്ഞിരുന്നത്.
അതേസമയം ബിജെപി പ്രവേശനം സംബന്ധിച്ച വിവാദം കോണ്‍ഗ്രസ്-ബിജെപി തിരക്കഥയെന്ന് എല്‍ഡിഎഫ് കണ്‍വീനര്‍ ഇ.പി.ജയരാജന്‍ പറയുന്നു. ഇതിനു ദല്ലാള്‍ നന്ദകുമാറിനെ കൂടെ കൂട്ടുകയും ചെയ്തു. പല വിഷയങ്ങളിലും വിവാദം പ്രതീക്ഷിച്ചവർ നിരാശരായെന്നും ഗൂഢാലോചനയാണ് നടന്നതെന്നും ഇ.പി ആരോപിക്കുന്നു.