മദ്യനയ അഴിമതി: ആറാമതും ഇഡിക്ക് മുന്നിൽ ഹാജരാകാതെ അരവിന്ദ് കെജ്രിവാൾ

എക്‌സൈസ് നയ അഴിമതിക്കേസിൽ എൻഫോഴ്സ്‌മെൻ്റ് ഡയറക്ടറേറ്റിന് മുന്നിൽ ഹാജരാകാതെ ഡൽഹി മുഖ്യമന്ത്രി അരവിന്ദ് കെജ്രിവാൾ. സമൻസ് നിയമവിരുദ്ധമാണെന്നും വിഷയം കോടതി പരിഗണനയിലാണെന്നും എഎപി. ഇത് ആറാം തവണയാണ് കെജ്രിവാൾ ഇഡി സമൻസ് അവഗണിക്കുന്നത്.
‘എൻഫോഴ്സ്മെൻ്റ് ഡയറക്ടറേറ്റ് തന്നെ കോടതിയെ സമീപിച്ചിട്ടുണ്ട്. വീണ്ടും വീണ്ടും സമൻസ് അയക്കുന്നതിന് പകരം, ഇഡി കോടതിയുടെ തീരുമാനത്തിനായി കാത്തിരിക്കുകയാണ് വേണ്ടത്’-ആം ആദ്മി പാർട്ടി പുറത്തിറക്കിയ പ്രസ്താവനയിൽ പറയുന്നു.

കഴിഞ്ഞ അഞ്ച് തവണയും നോട്ടീസ് നൽകിയെങ്കിലും കെജ്രിവാൾ ഹാജരായിരുന്നില്ല. ഇതേ തുടർന്ന് ഇന്ന് ഹാജരാകാൻ ആവശ്യപ്പെട്ട് ആറാം തവണ ഇഡി സമൻസ് നൽകുകയായിരുന്നു. തുടർച്ചയായി നോട്ടീസുകൾ അവഗണിച്ച സാഹചര്യത്തിലാണ് ഇഡി കെജ്രിവാളിനെതിരെ കോടതിയെ സമീപിച്ചത്. കെജ്രിവാളിനെ ചോദ്യം ചെയ്യാൻ ഉത്തരവിടണമെന്ന് ആവശ്യപ്പെട്ടായിരുന്നു ഹർജി.